Indomo bakawan jo Usuik; Menan bapasangan jo Sidi Dagun.
Tampaknyo Menan jo Sidi Dagun nak mambangkik kakalahannyo 3 - 0 oleh Indomo jo Usuik.

"Assalamualaikum".
Mak Sati nan baru datang manyampaikan salam kapado nan sadang bakumpua tu, tamasuak Ajo Udin jo Bagindo nan manonton sajo.
Mereka serempak manjawek salam tu - wassalamualaikum warohmatullohi wa barokatuh !

"E, e, iko baulang pasangan minggu nan lapeh." Mak Sati manyapo ramah.
"Iyo Mak Sati, si Menan jo Sidi Dagun minggu nan lapeh kalah 3 - 0 dek kami. Kini tampaknyo baliau-baliau tu nak mambangkik batang tarandam."
Usuik maningkah.

"Ba-a mambangkik batang tarandam ? Papatah tu waang pakai Suik, tapi indak tapek manggunokannyo !
Kok ayahnyo Menan jo Sidi Dagun kalah bamain domino, sahinggo namonyo tapuruak dan kini inyo balehkan sahinggo namo ayahnyo tarangkaek baliak, barulah dapek dikatokan mambangkik batang tarandam."

"Kini awak antikan dulu badomino, awak mintak panjalasan Mak Sati tantang mambangkik batang tarandam, jan lamo bana awak tasasek." kato Indomo maningkahi.

"Jadi, kini simpan batu domino. Dangakan elok-elok, ambo jalehkan." kato Mak Sati.
"Kiniko nan sadang mambangkik batang tarandam tu ado duo kelompok.
Partamo kelompok si mBak Wati basaudaro, nan kaduo kelompok mbak Tutut antek-antek ayahnyo !
Nan tarandam iolah namo baiak Soekarno sarato namo baiak Suharto.

Karajo si mBak Wati basaudaro jo mBak Tutut mancontoh Sabai nan Aluih di nagari awak maso saisuak.
Tapi ado pulo pangajaran urang tuo-tuo mengecekkan; tuah anjiang, cilako kudo

"A pulo tu mukasuiknyo Mak Sati ?" Usuik manyelo.
"Dangakan baiak-baiak nak ambo uraikan.
Anjiang kalau nyo duduak, tandonyo sehat - batuah.
Sabaliaknyo kudo kalaunyo duduak, tando sakik - cilako.

Bangkiknyo namo Soekarno bagi mBak Wati adiak-baradiak, ditambah sabagian urang di subarang (Jawa dan Bali) adolah sangek manyanangkan - "batuah".
Maklumlah namo Soekarno alah dirandam oleh pamarentah salamo tigo puluah tahun, karano dituduah tarlibat peristiwa pemberontakan G30S, sarato indak namuah mambubarkan P.K.I dan nyato-nyato mamanjarokan lawan politiknyo tanpa pangadilan atau malanggar HAM manuruit istilah kiniko !

Tapi bagi urang awak sangek manyakikkan - taringek maso ampek puluah limo tahun nan silam.
Dengan parentah langsuang Soekarno kampuang awak dibom jo bom napalm/api, dimitraliur (tamasuak rumah angku Doto admin) karano indak satuju jo paham demokrasi terpimpin model Soekarno nan bamain mato jo P.K.I.

Wakatu itu sabanyak 6.115 urang kampuang mati tabunuah dan 627 urang hilang antah siang, antah malam dan indak tantu kubuanyo di tangah rimbo atau dihanyuikkan di batang aia.
Kematian mereka itu untuak managakkan apo nan diyakininyo yaitu otonomi, demokrasi di NKRI sarupo cito-cito reformasi masokini ko, indak samo doh jo pemberontakan GAM, RMS, Papua, PKI, dll. nan jaleh-jaleh separatis

Ratusan rumah dibaka
Nan paliang gadang karugiannyo iolah sebanyak lk.400 mahasiswa awak nan sadang manuntuik ilmu pulang dari Jawa. Kalau dietong jo inflasi jumlah mahasiswa, maka jumlahnyo kiniko labiah kurang 4000 (ampek ribu) urang nan bajuang maangkek sanjato malawan rezim diktator Soekarno
Mereka itu bagabuang basamo-samo jo mahasiswa di kampuang untuk mendukuang perjuangan menegakkan demokrasi itu dengan caro manjadi sukarelawan di nagari-nagari. Banyak nan mati tabunuah, itulah karugian nan paliang gadang rasonyo.
Nan salamaik hanyo sabagian ketek sajo bisa malanjuitkan pandidikannyo."

Bangkiknyo namo Suharto bagi mBak Tutut sarato jo kawan-kawannyo marupokan tuah dan manyanangkan untuak kaum-karabatnyo.
Tapi bagi awak indak ado doh untuangnyo saketek juo !
Wakatu pamarentahan Suharto sagalo tingkah laku masyarakaik alah diubah manjadi perilaku urang desa nan sanang maminta-minta bantuan saroto disubsidi.
Bencana alam dijadikan lahan managguak di aia karuah.

Padohal subsidi itu pitih pinjaman dari lua nagari dengan caro manggadaikan kekayaan negara kito.
Inyo sabuik itu bantuan dari lua nagari, padohal utang nan harus dibayia oleh anak-cucu kito.
Rakyat harus patuah-toat, indak buliah basuaro mambantah kabijaksanaan atasannyo, meskipun pemimpin itu manyeleweng.
Sarupo jo caro-caro pamarentahan rajo-rajo di tanah Jawa maso saisuak, sahinggo pejabat-pejabat dapek semena-mena malakukan KKN atau mancilok pitih nagara.

Nagari alah dipacah manjadi desa.
Karano indak ado nagari, adat nan salamoko tak lapuak dek ujan alah caia, dan nan tak lakang dek paneh kiniko alah hancua.

Jantan jo batino alah campua bau dalam pargaulan sahari-hari, goyang Inul nan memang indak marupokan sumbang di kampuangnyo alah mamasyarakat pulo di tampek awak.
Utan jo lauik alah tagadai, tamasuak pabirik simin di Indaruang alah dijua pulo.
Sia nan barani mambantah Suharto dianggap anti pembangunan jo anti Pancasila.

Kiniko pitih nan dikumpuakan salamo mamarentah tigo puluah tahun sangaik banyak.
Jadi apo sajo bisa inyo karajokan, tamasuak mambali tuah dengan caro batabua urai mambagi-bagikan sambako.

Jadi urang tu sadonyo sadang mambangkik batang tarandam untuak mamuliahkan namo bapaknyo masiang-masiang."
"Jadi kalau baitu awak indak paralu sato-ikuik mambangkik "batang" urang tu doh Maka Sati ...!"
Usuik mamotong carito Mak Sati.

"Tasarah dek kalian se lah ....namonyo kan pemilihan umum mamiliah wakil-wakil rakyat Sumatera Barat.
Kok mamaliah pamimpin-urang gadang caro diawak, syaratnyo inyo harus sehat jasmani dan rohani.

Sabab di tampek awak, nan cadiak lawan barundiang, nan buto pahambuih lasuang, nan lumpuah panunggu rumah.
Memang bisa pulo urang buto jadi pamimpin tapi inyo musti dipimpin pulo oleh nan mambimbiangnyo.
Lain dari pado itu pamimpin tu harus tahu di Ompek !
Contohyo sarupo Habibie daulu, inyo urang pintar diakui dunia banyak pitih pulo hasil manjua lisensi kapa tabangnyo di Jerman. Itu sajo nasehat ambo."

Indak sempat batanyo, Mak Sati lah tibo di ateh beca. Ruponyo ado janji.
"Iyo santiang Mak Sati ko. Ado-ado sajo pikiran baliau, lengkap, ado budaya, ado syariat, ado gurau ado falsafah, patuik bagala Sutan Sati sasuai jo kesatiannyo !
Pikia-pikialah Suik."
Menan manyindia. Apo nan ka dipikia.

Haluihnyo Mak Sati bak kato urang awak, kilek camin alah ka muko, kilek baliung alah ka kaki.
Alun kilek alah kalam, alun diliek alah paham.
Oke, oke suaro urang tu serempak.
Mari kito sumbayang asya daulu, beko dilanjuikkan badomino !